မှန်ကန်သော လေမှုတ်စက်အသုံးပြုခြင်း

ဆံပင် လေမှုတ်စက်ကို မိန်းကလေးတိုင်းသုံးစွဲကြသော်လည်း ဆံပင်သားမပျက်စီးစေရန် မှန်ကန်သောနည်းလမ်းကို သိနိုင်စေရန် ရည်ရွယ်ပါသည်။

မှန်ကန်သော လေမှုတ်စက်အသုံးပြုခြင်း Blow drying

အိမ်မှာသုံးဖို့ လေမှုတ်စက်ကို ဝယ်တဲ့အခါမှာ လေပြွန်ခပ်ရှည်ရှည်နဲ့ အလေးချိန်ပေါ့တာမျိုးကို ရွေးချယ်ပါတယ်။အသုံးပြုရလွယ်ကူပြီး သဘာဝလေရဲ့လှုပ်ရှားမှုမျိုးနဲ့ ဆံပင်ကို ခြောက်သွေ့စေနိုင်သလို အကောက်များကို ပြေလျော့စေနိုင်တဲ့ Diffuser ကို လေမှုတ်စက်ပြွန်ရှည်ထိပ်မှာ တပ်ပေးပြီးလည်း ပုံသွင်းပေးနိုင်ပါတယ်။ဆံပင်ကို ချောမွေ့တောက်ပြောင်တဲ့ ပုံစံမျိုးဖြစ်စေချင်ရင် လေမှုတ်စက်မှာ လေကို စုစည်းစေတဲ့ ကိရိယာတပ်ပြီးမှ ပုံသွင်းပေးပါ။

ဒါမှလေကို လေပြွန်ထိပ်ဝမှာ စုစည်းစေပြီး ဆံအိတ်ပြွန်လေးတွေကို လိုရာပုံသွင်းနိုင်အောင် တွန်းလွှတ်စေမှာဖြစ်တယ်။သတိထားရမှာက ဆံပင်ကို လေမှုတ်တဲ့အခါမှာ ဆံပင်ရဲ့အောက်ကနေ မဟုတ်ဘဲ အပေါ်ကနေ အောက်ဘက်ကို လေမှုတ်ပေးရပါမယ်။ဆံပင်အောက်ဘက်ကနေ ဆံပင်သားတွေကို လေမှုတ်တဲ့အခါမှာ ဆံပင်များအပေါ်ဘက်လွှင့်တက်ပြီး ရှုပ်ထွေးတတ်သလို အရောင်ကိုလည်း မှေးမှိန်သွားစေနိုင်ပါတယ်။တစ်ကယ်လို့ အောက်ဘက်မှ လေမှုတ်မယ်ဆိုရင် လေမလွင့်အောင် ဆံပင်သားအဖျားပိုင်းများကို လက်ဖြင့်ပါ အုပ်ထားပေးရပါမယ်။

ဆံပင်အုံများသယောင်ဖြစ်စေလိုတဲ့အခါမှာတော့ ဦးခေါင်းကို အောက်ဘက်ငုံ့ချလိုက်ပြီး ဆံပင်အရင်းနေရာကို လေမှုတ်စက်နှင့်မှုတ်ပေးပါ။အချိန်ရရင်တော့ ဆံပင်ကိုအပိုင်းလေးများခွဲပြီး ဆံပင်လိပ်တံနှင့်ဖြစ်စေ၊ လက်နှင့်ခွေပြီး အလိပ်လေးများကို ကလစ်နဲ့ညှပ်ထားလို့ဖြစ်စေ အရင်ဆုံးပုံသွင်းထားပြီးမှ လေကို စုစည်းပေးတဲ့ Diffuser နဲ့ သဘာဝဆန်ဆန်လှပအောင် လေမှုတ်ပြီး ပုံသွင်းပေးပါ။

ကိုးကား - နန်းအိအိဇာ ( ဆံကေသာအကြောင်းသိကောင်းဖွယ်ရာ )